Biskuttini tar-raħal

07:25  |  08.09.2015

Din ir-riċetta hija tal-ħabib tiegħi Renato Briffa, lecturer fl-ITS u speċjalista tal-ħelu Malti. Dawn il-biskuttini huma ekonomiċi aktar mill-biskuttini tal-lewż jew taċ-ċirasa.

Ingredjenti (għal 35-40 biskuttin):

250g dqiq

125g zokkor

50g butir

125g bajd (iżen il-likwidu)

35g lewż mitħun

20g aniżetta

10g baking powder

niskata msiemer tal-qronfol mitħunin

ftit qtar vanilla

qoxra maħkuka ta' kwart ta' larinġa u kwart ta' lumija

Metodu:

B'mixer tal-elettriku ħawwad iz-zokkor u l-butir u meta t-taħlita ssir ħafifa żid il-bajd imħabbat. Għarbel il-dqiq u l-baking powder. Żid il-ħwawar, il-lewż mitħun, il-vanilla u l-qoxra taċ-ċitru u ħawwad bil-mod sakemm ikollok konsistenza lixxa.

Żid l-ingredjenti xotti mal-taħlita tal-butir u ħawwad b'mgħarfa kbira tal-metall.

Iksi dixx bil-kartaforn. Ippajpja t-taħlita ftit ftit fuq id-dixx jew inkella uża kuċċarina.

Aħmi ġo forn b'temperatura ta' 190 grad Celcius għal madwar 15-il minuta. Tħallihomx isiru kanella.

Jekk trid, meta jiksħu ppajpja disinn bil-ġelu, tradizzjonalment ta' lewn ikħal jew roża.